20140429

ඔබේ විසිතුරු ප්‍රතිරූපය.............


කොයි තරම් විසිතුරු වුණත්
ප්‍රතිරූපයක් කියන්නෙ පඹයෙක්..


ඔබ කොයි තරම් විසිතුරු
ලොකු ප්‍රතිරූපයක් හැදුවත්
සැබෑ ඔබ තරම් වටින්නෙ නැහැ..

ප්‍රතිරූපය විසිතුරු වෙන තරමට..
ඇතුළෙ ඉන්න පුද්ගලයා
විරූපී වෙනවා.
ප්‍රතිරූපය විශාල වෙන තරමට..
ඇතුළෙ ඉන්න පුද්ගලයා
පුංචි වෙනවා...
තනි වෙනවා.
උමතු වෙනවා...

20140427

දක්ෂ ශිල්පියෙකුත් කලාත්මක ශිල්පියෙකුත් අතර වෙනස



මේ සත්‍යතාවයන්
ඡායාරූප ශිල්පයටත් එසේමයි..
____________________________________________________________________________


දක්ෂ චිත්‍ර ශිල්පියෙකුත්
කලාත්මක චිත්‍රශිල්පියෙකුත් අතර
අහසට පොළව වැනි වෙනසක් තියනවා.

දක්ෂ චිත්‍ර ශිල්පියා
ඇසට පෙනන සත්‍යය
එලෙසින්ම ප්‍රතිනිර්මාණය කරනවා.


කලාත්මක චිත්‍රශිල්පියා අපට නොපෙනෙන
ඔහුට පමණක් පෙනෙන දෙයක්
ඉතා සරලව ඉදිරිපත් කරනවා.

දක්ෂ චිත්‍ර ශිල්පියෙකුගේ චිත්‍රයක් තුළ
නොයෙක් ආකාරයෙන් ඔහුගේම ප්‍රතිරූපයත්
දකින්නට පිළිවන්..
ඔහුත් එහි ප්‍රධාන චරිතයක්..

කලාත්මක චිත්‍රයක ශිල්පියා සොයාගත නොහැකියි.
එහි ඇත්තේ ඔහු පෙන්වන දේ පමණයි.
ඇසින් දකින තොරතුරු එහි ඇත්තේ
ඉතාම අවම වශයෙනුයි..

එහෙත් ඔහු පෙන්වන දේ තුළින්
ඔහු විඳින ලද හැඟීම අපිට දැනෙනවා.
____________________________________________

මේ චිත්‍ර දෙකෙන් එකක්
සියලු විස්තර සහිතව
සජීවීව නිර්මාණය කර තිබෙනවා.
එහි සුන්දරත්වය
දක්ෂ වේශ නිරූපණ ශිල්පියෙක්,
දක්ෂ රූප ලාවණ්‍ය ශිල්පිනියක් විසින්
මනාව හැඩගන්වන ලද
සුන්දර මනාලියක් වගෙයි.


පාන්දර දිය නාගෙන
පැන් කළයකුත් ඉනෙන් රැගෙන
දිය රෙද්ද පිටින්,
තෙත කෙහෙරැල් සමග
මීදුම අතරින්
ගම්මානයක කෙතක් මැද්දෙන්
නියරක් දිගේ පිය මැන එන
පියකරු යුවතියක් මෙන්
අනික් චිත්‍රය අව්‍යාජයි.

මේ චිත්‍රය
වයසක බව අපට පෙන්වන්නේ
හැම මහළු කතකගේම මුහුණේ දක්නට ලැබෙන
රැලි වැටීම් හෝ නොසලකා හරිමින්.
ඉන් රූපයට සිදුවූ
කිසිම අඩුවක් නැහැ.

මේ ශිල්පීන් දෙදෙනාම
දෙවිදියක දක්ෂයින්.

තමා තුළ නැති...
අනෙකා තුළ ඇති අපූර්ව දක්ෂතාවයන්
තමා තුළිනුත් මතු කරගන්නට
මේ දෙදෙනාම උත්සුක විය යුතුයි.

-------------------------------------------------------
මා ඍජුවම මෙසේ කියන්නේ
චිත්‍රශිල්පයටම ජීවිතය වෙන් කළ
වියපත් චිත්‍ර ශිල්පියෙකු ලෙස
මගේ අරමුණත් එයම බැවින්...

20140410

චිත්‍ර ශිල්පයෙන් ඡායාරූප ශිල්පයට ආලෝකයක්..


Artist Andrew Wyeth

ඡායාරූප ශිල්පියෙක් කරන්නෙ
තමන් දකින දර්ශනයක්
තමන් දකින කෙනෙක්, සතෙක්..
සුදුසු කෝණයකින්, සුදුසු රාමුවක් තුළ
ඡායාරූප ගත කිරීමයි.

සාමාන්‍ය චිත්‍ර ශිල්පියෙක්
ඡායාරූප ශිල්පියෙක් වගේම
දකින දේ දකින විදියට
අඳින අවස්ථා තියනවා.

දක්ෂ චිත්‍ර ශිල්පීන්
තමන්ගෙ හැකියාව සහ රුචිය අනුව
චිත්‍රයක් නිර්මාණය කරනවා.
පළමුවෙන්ම ඔහු මේ සඳහා
 සැකිල්ලක් නිර්මාණය කරගන්නවා.

මේ සැකිල්ල ඔහුගෙ හැඟීමෙ දළ සටහනක්.
ඔහු ඒ හැඟීම තව කෙනෙකුට
විඳින්න හැකි තත්වයට අත් කළ යුතුයි.


සිත්තරාගේ හැඟීමෙ දළ සැකිල්ලට
වර්ණ, හැඩතල, රේඛා ආදිය මගින්
ජීවය කැවීම ඔහුගේ කාර්යයයි.

ඔහු අවසානයේ කරන නිර්මාණය
ඔහුගේ මූලික සැකිල්ලට
බොහෝ සෙයින් වෙනස් විය හැකියි.

ඡායාරූප විශ්ලේෂණය කිරීමෙන්
අපි සොයන්නෙ ඡායාරූප ශිල්පියා
ඡායාරූපය ගන්න මොහොතකට කලින්
සිතින් දැක සිතින් විඳි සැකිල්ලයි.

එසේ විශ්ලේෂණය කිරීම
කුසීත ඡායාරූප ශිල්පීන්ට
අප්‍රසන්න කාර්යයක්.
ඔවුන් කැමති හිතුමතේ ඡායාරූප ගන්නයි.
කිසියම් විනයක් පවත්වා ගැනීම
ඔවුන්ට හිසරදයක්.

ඔබ එවැන්නෙක් නොවෙයි නම්
ස්වෝත්සාහයෙන් ඡායාරූප විමසලා
රිද්මයානුකූල සැකිල්ල සොයා ගන්න.

ඔබ ඡායාරූප ගන්නා විටත්
මේ සැකිල්ල දකින්නට උත්සාහ කරන්න.

===========================================

අපි රූපයක් දකින විට
ඉරියව්ව හා සත්ව වර්ගයා අනුවත්
වෙනත් නොයෙක් සමානතා අනුවත් සමාන දේවල්
නිරායාසයෙන්ම වර්ගීකරණය කොට කාණ්ඩ ගත කරනවා.
සමාන වර්ණ වශයෙන් හා සමාන හැඩ තල වශයෙන්
සමාන ගුණ මත රූප කාණ්ඩ අප සිතට දැනෙනවා.

මේ ඡායාරූප වල
සමාන වර්ණ වශයෙන් හා සමාන හැඩ තල වශයෙන්
දක්නට ලැබෙන කාණ්ඩ හඳුනා ගන්න.

.
 
 
 මේ සටහන බලන්න

============================================================

බැලූ බැල්මට සාමාන්‍ය ඡායාරූපයක්.
 විශ්ලේෂණය කරල බැලුවාම
අතින් එහාට මෙහාට කරල හදාගත්තා වගේ
සමබර රාමුවක්
 
 ඡායාරූපයක් තුළ රටා මතු කර ගන්න නම්
අවම වශයෙන් අන් අයගෙ ඡායාරූප තුළවත්
රටා හඳුනාගත හැකි සංවේදී මනසක්
ඡායාරූප ශිල්පියාට තියෙන්න ඕනෙ.

සැබෑ ත්‍රිමාණ පරිසරයෙ
රටා දකින්න අපහසුයි.

දක්ෂ ඡායාරූප ශිල්පීන්ගෙ
ද්විමාන ඡායාරූප විශ්ලේෂණය
ඊට හොඳ පිවිසුමක්.

Photos by Steve McCurry

 මේ ඡායාරූපවල
උදාසීන වර්ණ සහිත වටාපිටාවෙ
රතු වර්ණය අරමුණට ඇස ගෙන යනවා.
ඒ නැතත් මේ පරිසරයෙ
ලොකු කුඩා හැඩතල සියල්ලම පාහේ
අපේ ඇස අරමුණ වෙත ගෙන යන විදියට
අරමුණ වටා රොක් වෙනවා.



රතු සහ කොළ වර්ණ
එකිනෙකට ප්‍රති විරුද්ධයි..
එකක් වැඩියෙන් සහ
අනික ගැලපෙන අනුපාතයකින් තියනවා නම්
හොඳ ඡායාරූපයකට
ඒ සංගතිය ආලෝකයක්.
මෙහි ඒ සංගතිය
ඉතාම හොඳින් පිහිටා තියනවා.
එම වර්ණ දෙකට බාධා නොවෙන විදියෙ
උදාසීන වර්ණ රටාවක්
පසුබිම් වීමත් නොමඳ සහායක්..

කලුපාට හැඩතලත්
කාන්තාව වටා සර්පිලයක් වගේ
කාන්තාවට අවධානය අරන් දෙනවා...


මෙහි සම්පිණ්ඩණ රටාව ඉතාම පැහැදිලියි..
-------------------------------------------------------------------------------------------
https://fbcdn-sphotos-d-a.akamaihd.net/hphotos-ak-prn1/21436_10200350303746907_723185843_n.jpg
Photo by Steve McCurry
 
 
 
 
 
 
 
 
 
 
 
 

20140408

මගේ ඡායාරූපකරණය


https://www.facebook.com/photo.php?fbid=10201545724391676&set=gm.222659281257927&type=1
මගේ ඡායාරූපකරණය
වෘත්තියක් හෝ
විනෝදාංශයක් නොවෙයි.
මගේ හැම ඡායාරූපයක්ම
අභ්‍යාසයක්.

මගේ ඡායාරූප යොමුවන්නේ
පොදු රසිකයා හෝ
ප්‍රවීණ ඡායාරූප ශිල්පියා වෙත නොවෙයි.
මා මෙන්ම හැදෑරීමක් ලෙස
ඡායාරූප කරණයෙහි යෙදෙන
නවක ඡායාරූප ශිල්පියා
පර්යේෂණයට පොළඹවන්නට
උත්තේජනයක් ලෙසයි.

තෝරාගෙන ඡායාරූප පළකරන අයගේ
පළකිරීම් බොහෝ විට එකාකාරීයි.
ඔවුන් පර්යේෂණ වලට බයයි.

එකම තැනක එකම දේක
විශාල ඡායාරූප සංඛ්‍යාවක් ගත්තොත්
මාත් පළ කරන්නේ එකක් තමයි.
ඒත් එතන ඉඳන් වටපිට බලලා
මම විවිධ ඡායාරූප
දහයක් පහළොවක් ගන්න ඉඩ තියනවා.
සංඛ්‍යාත්මකව බැලුවොත්
විවිධත්වය වැඩිම
මගේ ඡායාරූප වෙන්න පුලුවන්.
ඉහළම මට්ටමේ ඡායාරූප
කිහිපයක් පළ කරනවාට වඩා
සාමාන්‍ය මට්ටමේ ඡායාරූප
සියගාණක් පළ කරන්න මා කැමතියි.
චමින්දගේ රුචිය අනුව
ඔහු පළකරන ක්‍රමය ඔහුට ප්‍රයෝජනවත්.
මා පළකරන ක්‍රමය මට කෙසේ වෙතත්
තවත් නවකයන් කිහිපදෙනෙකුටවත්
ප්‍රයෝජනවත් වෙතැයි
මා අනුමාන කරනවා.

කලක් ක්ශේත්‍රයේ රැඳී පදම්වූ පසු
නමක් හදාගන්නට
ප්‍රතිරූපයක් හදාගන්නට වෙහෙසෙන
වෘත්තීය ඡායාරූප ශිල්පියෙක්
අනුගමනය කරන ක්‍රියා කලාපය
නවකයෙකුට වඩා බෙහෙවින් වෙනස්.
ඔහු දාහක් ගත්තත්
තෝරාගන්නේ
තමන්ගේ ප්‍රතිරූපය ඔප වැටෙන
ඡායාරූප කිහිපයක් පමණයි.

එසේ තෝරා බේරාගෙන පළ කරන ඡායාරූප
එකාකාරී වෙන්නත් පුලුවන්.

නවකයෙක් ඒ වගේ හිතන්න පෙළඹුණොත්
ඔහුගෙ අනාගතය අඳුරුයි.

ජීවිතයේ හැම දේකදිම
මම මැරෙන තුරුම හැසිරෙන්නේ
නවකයෙකුගේ මානසිකත්වයෙන්.
නවකයෙකුට ස්වයං විවේචනයට වඩා
බැහැරින් එන විවේචනය වටිනවා.
බොහෝ නවකයින් විසින්
ඉතාම හොඳ ඡායාරූප පිළිබඳව
හීනමානයෙන් පෙළෙන අවස්ථා
අපි දකිනවා.

ඔහුට තිබිය යුත්තේ කුතුහලයක්.
බලාපොරොත්තු නොවෙයි.

මෙහි දුර්වල ඡායාරූප පළ කරන කෙනෙක්
නොමග ගියොත් නොමග යන්නේ
ඔහුට අනුකම්පාවෙන් කරන
බොරු වර්ණනා මතයි.
නැත්නම් ඔහුට නිසි පිළිතුර ලැබෙනවා.

නවකයෙක් ලෙස හිතන නිසා
මා පළ කරන ඡායාරූප පිළිබඳව
මටත් කුතුහලයක් තියනවා.

මගේ ඡායාරූපයකට ලැබෙන
ලයික් ප්‍රමාණය මට අදාළ නැහැ.
පැහැදිලි හේතු මත කරන
අදහස් පළකිරීමක්..
ඒ ගැන අහන ප්‍රශ්නයක්
ලයික් දාහකට වඩා වටිනවා.

ලැබෙන ලයික් ප්‍රමාණය
ඡායාරූපයක අගය මනින්න
කිසි සේත් නුසුදුසු බව
Art Gallery
යෙහි අන් කිසිවෙකුටත් වඩා හොඳින්
මා දන්නවා.


පැය විසි හතරක් තුළ ලයික් දාහක් ලැබුණ මගේ ඡායාරූපය
කිසිදු ප්‍රවීණ ශිල්පියෙක් අගය නොකරනු ඇති.

එම ඡායාරූපයම කලකට පෙර
සාමාජිකත්වය දෙගුණයක් වන
Photo Talk සමූහයේ පළකල අවස්ථාවේ
ලයික් පණහක්වත් වැටුණා කියා
මා හිතන්නේ නැහැ.

ලයික් වැටීම ලොතරැයි දිනුමක් වගෙයි..
එය සාර්ථක මිම්මක් නොවෙයි.

රසිකයන් ඡායාරූප වලට කැමති වන්නේ
ප්‍රවීණ ඡායාරූප ශිල්පීන්
මනින මිමි වලින් මැනලා නොවෙයි.
ඔවුන් ඡායාරූපයකට කැමති වන්නේ
ඒ ඡායාරූපයෙන් ඔහුට ඇතිවෙන
හැඟීම අනුවයි.

තාක්ෂණික කරණම්, සම්පිණ්ඩණ කරණම්,ආදිය
රසිකයන් නොසලකන අවස්ථා මෙන්ම
ඒවා තුළ ගිලී අතරමං වෙන අවස්ථාත් තියනවා.

ෆේස්බුක් සමූහයක් කියන්නෙ ආයතනයක් නොවෙයි.
අවිනිශ්චිත පිරිසක් අවිනිශ්චිත ලෙස හැසිරෙන
බස්නැවතුම්පළක් වැනි තැනක්.

මෙවැනි තැනකින් නිශ්චිත දේ සොයන කෙනෙක්
මුළා වෙනවා පමණක් නොවෙයි..
නිකරුණේ ඉච්ඡා භංගත්වයටත් පත්වෙනවා.

20140403

ඡායාරූප තරඟ




තරඟයක් පිළිබඳ විස්තර ටිකක්
හිතවතෙක් පුද්ගලිකව එවා තිබුණා.
මේ ඔහුට මා ලියූ පිළිතුරයි.
----------------------------------------------
ස්තූතියි.. ඔබට,
තරඟ හෝ තරඟ ප්‍රතිඵල ගැන
මා උනන්දු නොවෙන බව ඔබ දැක ඇති.

නවකයෙකුගේ ඡායාරූපයක් තරම්වත්
තරඟ ජයග්‍රහණයක් පිළිබඳ
වාචික තොරතුරක් මට වටින්නේ නැහැ,.

පුද්ගලිකවත්
මට කිසිම ක්ෂේත්‍රයක
තරඟකාරී මානසිකත්වයක් නැහැ.
වෙනත් කෙනෙකුට හරියි කියල
ඔවුන් හිතන දේ අනුමාන කරමින්
ඔවුන් බලාපොරොත්තු වෙන දේ කරල
දිනුවාම සතුටක් ලැබුණත්
ඒ මම නොවෙයි නේද.?

ඕනම තරඟයක ඉන්නෙ
විනිසුරුවන්ගෙ සහ රසිකයන්ගෙ වහලෙක්.

දිනන්නට නොසිතා
තරඟ වලට ඉදිරිපත් වුණොත්
ඔබ කරන්නට සිතන
නව නිර්මාණ කරන්නට
යම් පෙරහුරුවක් නම් ලැබේවි.

ඒත් තරඟයකට ඉදිරිපත් කරන ඡායාරූපයක්
ඔබේ ස්වාධීන නිර්මාණයක් නොවෙයි.

කිසියම් ප්‍රේක්ෂකයන් පිරිසක්
අරමුණු කරගෙන කරන
කිසිම නිර්මාණයක් ස්වාධීන නැහැ.

මම ඡායාරූපයට නගන්නෙ
මම රස විඳින දේ.
මගේ ඡායාරූප හැම එකක්ම හොඳ නොවෙන්නත්
පුලුල් පරාසයක විවිධත්වයටත් හේතුව එයයි.
අනික් අය රස විඳින්නෙ මොනවද කියල
හොඳින් හැදෑරුවත්
ඔවුන් පිරිසකට සේවය කරන්නෙ නැහැ.
කැමති කෙනෙකුට
රස විඳින්න හවුල් වෙන්න පුලුවන්.
ඔවුන් කවුද කියල පූර්ව නිගමන මට නැහැ.
කෙනෙක් ඒක හෙළා දැක්කත්
එය ඔහුගෙ ප්‍රතිචාරය ලෙස පිළිගන්නවා.

මගේ යම් ඡායාරූපයකට
පැය විසිහතරක් තුළ ලයික් දාහක් වැටුණත්
ඒ ඡායාරූපය
අමුතු විශේෂ ඡායාරූපයක් වෙන්නෙ නැහැ.
ඒ ඡායාරූපය රස වින්ද පිරිස විශේෂයි.
ජීවිතයේ එක වරක් එක වේදිකාවක
අපි මුණ ගැහුණා කියන්න පුලුවන්.
ඒත් ඔවුන් අතර
මතු කවදාවත්ම
නැවත මගේ ඡායාරූපයක්
අගය නොකරන අයත් ඇති.
ඔවුන් රැකගන්නට,
බැඳ තබා ගන්නට වෙහෙසීම
ඔවුන් සතුටු කරන්නට ඡායාරූප ගැනීම
නිරර්ථක වෑයමක්...

නිතර නිතර ඡායාරූප ගත කරද්දි
ඉගෙනගන්නට ලැබෙන අලුත් රීති නිසා
ආකල්පවල වෙනසක් වුණොත් විනා
ජාත්‍යන්තර ඡායාරූප තරඟයකින් දිනුවත්
මගේ ඡායාරූප පිළිබඳව
මා දරන ආකල්පවල වෙනසක් වෙන්නෙ නැහැ.

මට නොපෙනුන වටිනාකමක් හෝ අඩුපාඩුවක්
නවකයෙක් හෝ රසිකයෙක් වුණත්
කරුණු සහිතව පෙන්වා දුන්නොත්..
එම කරුණු නිවැරදියි කියලත් පැහැදිලි නම්
මගේ ආකල්පය ඉබේම වෙනස් වෙනවා.

දක්ෂ ප්‍රවීණයෙකුගෙ අපූර්ව නිර්මාණයකින්
දක්ෂ නවකයෙකුගෙ විශ්මිත නිර්මාණයකින්
මගේ ආකල්ප පැහැදිලි ලෙස වෙනස් වෙනවා.

තරඟ ප්‍රතිඵලයකින්
විශාල ලයික් සංඛ්‍යාවකින්
අපේ ඡායාරූප වලට
අමුතු වටිනාකමක් ලැබෙන්නෙ නැහැ.
ඒ ප්‍රතිඵලය නිසා
අපේ හැකියාව දියුණු වෙන්නෙත් නැහැ.

ඡායාරූපයකට ලැබෙන පිළිගැනීම
නිහතමානී කෙනෙකුට
නාඳුනන කෙනෙකුගෙ සුහද මදහසක් මෙන්
සිත සැහැල්ලු කරන මිහිරක්.

මාන්නාධික කෙනෙකුට නම්
ඡායාරූපයකට ලැබෙන පිළිගැනීම
ඔලුව තව ටිකක් ලොකුවෙන එන්නතක්.

වැරදි විදියට ඒ ප්‍රතිචාරය වින්දොත්
ඒ පිළිගැනීම අපේ ජීවිතයට ඇමිණූ
අනවශ්‍ය බරක් වෙනවා.

එවැන්නන් තමන්ගේ ක්ෂේත්‍රයෙ පිරිහෙනකොට
අන්තිමට ගිහින් නවතින්නෙ දේශපාලනයෙයි.

ඡායාරූපයක් ගැන කරදර වෙනවා නම්
කරදර වියයුත්තෙ මීළඟ ඡායාරූපය ගැනයි.

මෙතෙක් ගත් ඡායාරූප
හැදෙන ගහක පත්‍ර වගෙයි.
මෝරලා ඉදිලා හෝ අකලට හදිසියේ වැටුණ
පත්‍ර විතරයි.

නව දලු ලන්නට ඇති කාලය
හැලුන පත්‍ර මහිමාන්විත කරන්නට ගතකිරීම
නාස්තියක් මෙන්ම,
අනවශ්‍ය මානසික වෙහෙසක්.

එහෙත් ඔබ මා මෙන් සිතිය යුතු නැහැ.

ඔබට තරඟකාරී මානසිකත්වයක් ඇත්නම්
මගේ වචන බැහැර කොට ඔබේ ගමන යන්න..

ජයග්‍රහණයෙන් උද්දාම නොවී
ඔබ දන්නා හඳුනන අයගේ වෙනස් වීම්
නිරීක්ෂණය කරන්න.
ඔබත් ඔවුනුත් වැඩි වැඩියෙන් හඳුනාගන්න..
ඔබට සුබ පතනවා.